Féile Dorn san Aer

Tabharfaidh ár n-aoi speisialta, an gníomhaí cearta sibhialta Bernadette McAliskey, caint spreagúil le tús a chur leis an chéad fhéile seo in ómós do Rónán Mac Aodha Bhuí. Ina dhiaidh sin beidh ceolchoirm leis na ceoltóirí binne Emma Ní Fhíoruisce agus Eve Belle agus na bannaí glórmhara Kila4 agus Huartan. Meascán réabhlóideach le tús spleodrach a chur leis an fhéile.

Ina dhiaidh sin beidh seans againn é a thógáil go breá bog le fuaimeanna réchúiseacha ó Sheán Ó Cuireáin i gClub na Féile san Amharclann nó damhsa i dTigh Hiúdaí leis an Boss Sound Manifesto.

Ceol don damhsa réchúiseach i dTigh Hiúdaí leis an ghrúpa Boss Sound Manifesto

Ón 10:30am ar aghaidh beidh Ionad Cois Loch i nDún Lúiche faoinár seilbh Dé Sathairn agus cead ag páistí úsáid a bhaint as na hacmhainní iontacha atá ar fáil ansin. Do pháistí beaga tá sleamhnán mór ann, tuairtcharranna, boghdóireacht, páirc spraoi, bádaí beaga agus áit bhogshúgartha. Ar 11am, do pháistí 2-8bl, cuirfidh Doimnic Mac Giolla Bhríde, Suzanne Ní Ghallchóir agus Niall Hackett an seó ceoil idirghníomhach Preab sa Cheol ar siúl ar ardán Ghéill Slí. Beidh péinteáil aghaidheanna ann agus ceardlann ealaíona do pháistí le Caren Blaney. Beidh ceardlann teicneolaíochta ann le Andy Caomhánach. Ná cailligí Karaoke Craiceáilte na Gaeilge d’óg agus d’aosta le Seán Ó Muireagáin agus Suzanne Ní Ghallchóir.

Beidh aonach ceardaíochta ar siúl i gCúl an Tí, áit a mbeidh earraí deasa lámhdhéanta go leor ar díol ag ceardaithe áitiúla. Mar shampla: seodra agus cártaí lámhdhéanta le Caitlín Nic Giolla Chomhaill; Beacha Chloich Cheann Fhaola le mil, coinnle agus araile; Seodra Calebe le Bernie Patton; péinteáil agus bascaidí le Eoghanaí Ó Duibhir; bia agus earraí na hÚcráine.

I gcomhar le Raidió na Gaeltachta beidh muid ag déanamh craoladh bradach in Ionad Cois Locha Dé Sathairn ar phíosaí éagsúla as cláracha Rónáin anuas thar na mblianta, siar go dtí a chlár réabhlóideach Cúl a’ Tí a chur sé i láthair le Hughie Mac Gairbhith. Beidh cluasáin le fáil ar iasacht ag seastán Macalla FM agus thig éisteacht ar do shuaimhneas le gúrú na n-aerthonnta arís.

Beidh stainníní bidh agus veaineanna bidh ag dáileadh amach an bia is blasta ó tháirgeoirí áitiúla ar feadh an lae. Muiceoil ón Choirbhín, Crêpes an Atlantaigh Fhiáin, burgair ó fheirm Lis na Maolagáin. Beidh togha agus rogha an bhidh agus an dí ag bialann Ionad Chois Locha chomh maith.

Máistir-ranganna – An Racadamh. Dé Sath, Ionad Cois Locha

Beidh 2 mháistir-rang ar siúl do cheoltóirí ar mian leo foghlaim faoi cheird na scríbhneoireachta ceoil agus faoi thaifead agus léiriú ceoil.

Máistir-rang 1 le Robert Ó Maolchiaráin - Dé Sath 12:30pm: “Ableton Live” Cén dóigh le do chloigeann a fháil thart air agus leis an chuid is fearr a fháil ón bhogearra chumhachtach seo. Míneoidh Robert cén dóigh le Ableton Live a úsáid le ceol a chruthú agus a mheascadh agus cén dóigh leis an chuid is fearr a fháil ón bhogearraí. Beidh an rang seo úsáideach do dhaoine atá ag úsáid Ableton don chéad uair agus do dhaoine ar mhaith leo leidí maithe a fháil faoin bhogearra.

Máistir-rang 2 le Marcus agus Naoise Mac Conghail - Dé Sath 1:30pm: “Scríobh amhrán” An mbíonn tú ag scríobh amhráin nó ar mhaith leat foghlaim cén dóigh le hamhrán a scríobh? Brisfidh Marcus agus Naoise fríd go leor den mhiotas a bhaineann leis an cheird le leidí úsáideacha a chuideoidh leat amhráin a scríobh agus tabhairt faoi na chéad chéimeanna sa phróiseas.

Áit na ndaoine dalba! Cuirfidh Rónán Ó Muirgheasa An Céilí Kitchen ar fáil ar feadh an lae d’imeachtaí neamhghnách, ailtéarnacha agus déanfaidh Brendy Loughan an stáitse beag seo a líonadh le ceoltóirí. Ní bheadh a fhios agat caidé bheadh romhat anseo sa Chéilí Kitchen - áit ar leith agus ‘Ionad buail isteach’ don teaghlach craiceáilte. Má tá uirlis ceoil leat buail isteach agus beidh fáilte theasaí romhat!

Beidh manglam ceoil agus craic le fáil ar stáitse Ghéill Slí. I ndiaidh Preab sa Cheol agus Karaoke Craiceáilte na Gaeilge beidh ceol bríomhar ann ó Cheoltóirí Thoraigh, cairde mór le Rónán Mac Aodha Bhuí. Ag Filíocht OS ARD cluinfidh muid toradh na gceardlanna filíochta agus rogha d’fhilí an cheantair ag aithris filíocht a chuirfeas meon agus spiorad Rónáin inár gceann. Beidh seans ansin steipeáil amach ar an urlár agus cúpla céim a fhoghlaim ó Chaitlín Joe Jeaic le ceol ón Chrann Óg. Beidh an píobaire súgach Ciarán Mac Fheidhlimidh linn ansin le muid a mhealladh lena cheol. Cuirfidh Conor Ó Gallchóir as a Choiteann meascán de cheol nuachumtha os ár gcomhair. Cluinfidh muid ceol ón Úcráin ansin ó Ghlór na hÚcráine, cór de phobal na hÚcráine atá sa cheantar agus críochnóidh stáitse Ghéill Slí le ceol ón bheirt dheartháir as an Pholainn, The Elephant Brothers.

Is mír an-speisialta í seo. Rachaidh an bád An Gráinne Rose amach ar dhá thuras ceoil agus cuideachta le haoicheoltóirí, áit a mbeidh deis ceol spioradálta a chluinstin ag macallú amach thar uiscí na locha faoi scáth na hEaragla – ag a 2pm tabharfaidh an sár-cheoltóir sean-nóis Brian Danny Minnie ar thuras ceoil muid agus ag 3:30pm beidh deis a dhul amach ar an loch le héisteacht le Mairéad Ní Mhaonaigh agus a iníon Nia d’eispéaras faoi leith. (Caithfear áit a chur in áireamh roimh ré don dá thuras seo mar go bhfuil na huimhreacha teoranta).

Ceardlann spraíúil ríomhaireachta do pháistí bunscoile i gcomhair le hOllscoil na Gaillimhe. Bainfear úsáid as micriríomhairí ar nós an Raspberry Pi agus an BBC Micro:bit, atá deartha go speisialta do pháistí. Gheobhfar blaiseadh ar chódú, ar ríomheolaíocht agus ar eolaíocht mar chuid den tseisiún seo. Cuirfear béim ar rudaí fisiceach a chruthú agus a ríomhchlárú ar nós róbait agus gléasanna cliste.

Ar stáitse Chath na mBannaí rachaidh 6 bhanna úr ceoil san iomaíocht do dhuais €2000 agus cead mórtais. Na Stands as an Fhál Charrach, Veridian ó Leitir Ceanainn, Earthmover as Baile Átha Cliath, Nollaig as Gaoth Dobhair, Little Kings as Doire agus Muichillí as Gaoth Dobhair. Bígí ansin leis an chéad bhannaí móra úr eile a fheiceáil den chéad uair!

Ar mhaith leat ceol ar an phríomhstáitse i gCór Dhorn San Aer? Tabharfaidh Doimnic Mac Giolla Bhríde ceardlann speisialta ceoil agus réiteoidh sé cór úr spontáineach Dhorn San Aer don ardán. Bígí ina theannta ar an phríomhstáitse!

Príomhstáitse – Dorn San Aer: Ionad Cois Locha Dé Sath 6-11pm Ceolchoirm mhór na deireadh seachtaine le scoith na mbannaí: ceol tíre le Diane Ní Chanainn & na Clubmen, ceol spásach fileata le Spásas, ceol fiáin nua-aoiseach le Cigire na bPuntaí, rapáil fuinniúil leis an bheirt fhonnadóirí fhoclacha Séamus agus Oisín ó Súil Amháin, ag briseadh amach na foinn le hIMLÉ agus ag críochnú suas leis an líne funcaíáilte Grooveline.

Oíche chraiceáilte Tigh Hiúdaí Beag, tógfaimid é go bog agus go te leis na déithe reggae - Bréag.

Nuair a chasann an múinteoir scoile JJ le Naoise agus Liam, dríodair na sráide, mar a thugann siad orthu féin, titeann rudaí amach a chuireann tús le grúpa hip hap nach bhfuil a chosúlacht le fáil ar an tsaol. Agus iad ag rapáil ina dteanga dhúchais, tosaíonn siad gluaiseacht lena dteanga agus iad féin a shábháil. (os cionn 16bl amháin)

Seó punc aonair le Michael McCaughan. La Habana 1958 ... tosóimid i gcasino i lár Habana agus rachaimid ar chamchuairt ar stair na réabhlóide le Fidel Castro agus na compañeros sa Sierra Maestra, ag tabhairt a dhúshlán don deachtóir Batista agus a chuid úinéirí i Washington DC. Bunaithe ar scéalta ó stair Chúbach agus sleachta ó dhialann phearsanta Mhichael. Beidh deis i ndiaidh an seó do cheisteanna agus do phlé.

Buailigí isteach go Teach Hiúdaí tráthnóna Dé Domhnaigh áit a gcuirfidh Aodán Ó Cearúil ceann ar Súp an Domhnaigh, ag cur thart an Bíobla, Abair Amhrán, agus ag ceol an tsoiscéil Ghaelaigh. Seisiúin ceoil ina mbeidh cuireadh chun ceoil ag gach duine. Seisiúin amhránaíochta oscailte.

Féasta ceoil le Róisín Chambers, an spealaire fánach John Spillane, ceoltóir na bliana Eoghan Ó Ceannabháin agus fondúirí an rac Ghaelaigh, Na Fíréin. Meascán craiceáilte an Domhnaigh le deireadh spleodrach a chur leis an fhéile, le Seán Ó Cuireáin ag casadh na gceirníní sa bhforhalla.